Kanaouennoù an hengoun dre gomz e brezhoneg
kavet el levrioù, kelaouennoù ha dornskridoù

Deoc’h da c’houzout - Un toullad termenadurioù

Dastumer : an hini a zastum ar c’han digant ar ganerien pe ar c’hanerezed.

Douger hengoun : an hini a gan, an hini en deus kanet ar ganaouenn d’an dastumer.

Folklorelaat : argerzh a ra d’ur c’han bezañ treuzkaset dre an hengoun dre gomz hag a zo kaoz ma teu ur c’han da gaout meur a stumm.

Kanaouenn-skouer : war ar meizad kanaouenn-skouer eo savet ar c’hatalogoù. Div ganaouenn a vo diwar ar memes skouer ma lavaront ar memes tra gant ar memes doare, da lavaret eo ma pledont gant ar memes sujed, en ur ober gant troiennoù heñvel a-walc’h. Da bep kanaouenn-skouer ez eus bet roet un titl unvan dezhi hec’h-unan.

Titl unvan : An titl roet d’ur ganaouenn-skouer.

Stumm : : ur stumm a zo ur ganaouenn dastumet en ul lec’h digant ur c’haner, hag embannet gant un « embanner » (an hini en deus graet an oberenn he deus lakaet ar ganaouenn da vezañ anavezet, peotramant an hini en deus savet an dornskrid m’emañ ennañ). Ne vez ket roet atav gant an embanner an titouroù diwar-benn ar c’haner hag al lec’h, met memestra ez int pennkaoz ma ‘z eus eus ar stumm-se.

Degouezh  : a-wechoù en deus bet ur stumm meur a embannadur (gant ar memes embanner e-barzh oberennoù disheñvel, e-barzh un dastumadenn, e-barzh un embannadur dre skrid ha goude e-barzh unan da selaou, hag all). Kement-se holl a zo degouezhioù disheñvel d’ur stumm.

Gwerz (el liester Gwerzioù) : ar gwerzioù a zo kanaouennoù hag a gont un istor, gant ur perzh dramatek. Gwechoù vez e kontont darvoudoù istorel (brezelioù, emsavadegoù, gwallzarvoudoù…), gwechoù all e komzont eus traoù mojennel (da skouer buhezioù sent, burzhudoù…) pe marvailhus (liammet gant ar marv, an ifern…), peotramant c’hoazh eus tammoù buhezioù, tonkadurioù…
Alies e kaver ar ger « complainte » e galleg pe « ballad » e saozneg evit seurt kanaouennoù.

Son (el liester Sonioù) : temoù skañvoc’h a zo gant ar sonioù. Komz a reont eus ar santimantoù (karantez, huñvreadelloù, dipitadennoù…), hag alies en devez an oberour ur perzh e-barzh. Gallout a reont kontañ tammoù traoù eus ar vuhez pemdez, pe mont war sujedoù flemmus (an techoù fall, ober goap…). A-wechoù e vezont savet da enoriñ tud pe ar vro. Met evel ar gwerzioù ez int kentoc’h kanaouennoù hag a gont un dra bennak (ral a wech e vez savet barzhonegoù just evit ar blijadur da varzhonegiñ e-barzh kan poblek Breizh).

Darempred Pajenn Facebook